🌞 Aburrirse en verán... si, por favor!

O verán está cheo de cousas fermosas e experiencias únicas: xeados, castelos de area, chapuzóns, sestas á sombra, días longuísimos que semellan non rematar nunca... e tamén, si, o temido aburrimento. 🐌

E é que, cando se detén o ritmo das rutinas do cole, os horarios afrouxan e non hai tanta estrutura… aparece ese momento tan incómodo para os peques e que moitas familias temen: – “Abúrrome moooitooo!”

Pero… e se che digo que ese momento non é unha alarma, senón unha oportunidade?

🌱 O aburrimento como semente

Dende a Disciplina Positiva entendemos que o desenvolvemento infantil precisa tempo, espazo... e non sempre máis actividades. Ás veces, cando non hai “nada que facer”, é cando máis cousas importantes pasan por dentro 🌻

💡 O aburrimento invita a mirar ao redor, a descubrir, crear, imaxinar, inventar...

• Constrúen unha tenda con mantas.

• Inventan unha lingua secreta.

• Redescobren ese libro esquecido.

• Quedan deitados no chan mirando para o teito (¡e iso tamén vale!).

  
  

🧠 Por que é tan valioso?

Porque cando unha nena ou un neno se aburre e non llo resolvemos nós, actívase o seu pensamento creativo, desenvolven a tolerancia á frustración e aprenden a estar consigo mesmos, a coñecer os seus gustos e intereses.

E si, ao principio pode haber protestas, queixiñas ou algún que outro mini drama 🎭 Pero se os acompañamos con calma e confianza, desde a comprensión e a empatía, sen présas por “entreter”, estámoslles dicindo: – ✨ “Confío en ti. Ti podes atopar o camiño.”

🛟 Que podemos facer dende a casa?

Aquí van unhas ideas pequenas e realistas:

• 🌤️ Crear un "tarro do aburrimento" con ideas escritas por eles e elas (ou pola familia).

• ⏳ Deixar espazos sen pantallas, sen plans, sen estímulos… e observar que pasa.

• 💬 Validar o que senten: “Xa vexo que estás aburrida... iso ás veces pasa. Queres pensar en algo que podes facer, ou prefires estar así un ratiño?”

  
  

🧘‍♀️ Unha notiña para ti, que acompañas

Respira fondo e dálle permiso tamén ao teu corpo para desfrutar deses momentos de non facer nada, de non planificar. Escoita o que precisas e intenta regalarche algún espazo ou pequeno capricho de cando en vez.

Ás veces, menos é máis. Confía no ritmo natural e na capacidade dos teus peques. Eles e elas tamén precisan desconectar e, nese oco… acontece a maxia ✨

💌 E ti? Lémbraste de cando te aburrías na infancia?

Cóntanolo se che apetece, encantaranos leerte 😊