🎁 Agasallos que acompañan… e agarimo que non se obliga

Chegan as festas e, con elas, un montón de momentos intensos: luces, familia, comidas longas, expectativas… e, por suposto, agasallos.

Para moitos e moitas peques, estas datas son ilusión pura, pero poden ser tamén ruído, comparacións, demasiados estímulos… e emocións que ás veces non sabemos moi ben como acompañar.

Desde a disciplina positiva, decembro non vai de “portarse ben para merecer cousas”. Vai de conexión, respecto e acompañamento no medio de todo o que pasa.

E dentro dese acompañamento hai dous temas que aparecen cada ano:

🎁 os agasallos

🤗 o agarimo que ás veces se pide… e ás veces se obriga

Imos paso a paso.

🧠 O que ocorre por dentro

O cerebro infantil vive estas datas con moita intensidade: novidade, expectativas, cambios de rutina, visitas, ruído, desorde, horarios distintos…

Todo iso é estimulante, si, pero tamén esgotador. E cando o cerebro está canso:

• cústalle máis compartir

• aparecen máis enfados

• hai máis impulsos

• as emocións desbórdanse con facilidade

Por iso, o que desde fóra parece “capricho”, desde dentro adoita ser necesidade de regularse e sentirse seguro/a.

🎁 Sobre os agasallos: menos perfección, máis sentido

Os agasallos non son o problema. a mensaxe que ás veces levan… si.

Cando un neno ou nena recibe algo e di “non me gusta” ou “eu quería outro”, non está sendo maleducado: está aprendendo a xestionar a frustración (igual que nós como persoas adultas seguimos aprendendo).

Desde a disciplina positiva podemos axudar así:

🔸 nomea o que sente

“imaxinábaste outra cousa e sénteste decepcionado. é normal.”

🔸 valida sen xustificalo todo

“non sempre podemos ter exactamente o que queremos, e aquí estou para acompañarte.”

🔸 baixa as comparacións

“cada familia fai o que pode e o que decide. nesta nosa, facémolo así.”

🔸 ofrece límites claros e tranquilos

“non imos abrir outro agora. podemos xogar con este e máis tarde vemos.”

Os agasallos non necesitan ser moitos. Necesitan ter sentido, xogo, tempo compartido.

e se este ano algo non chega “como esperaban”… tamén é aprendizaxe.

🤗 o agarimo que non se obriga

estas datas adoitan traer frases moi coñecidas:

“dálle un bico á tía”

“abraza ao avó, que se non vaise enfadar”

“veña, non sexas tímida”

Facémolo coa mellor intención: que sexan amables, que non queden mal, que todo sexa agradable. Pero a mensaxe que reciben, sen querelo, pode ser esta:

👉 “o meu corpo non me pertence do todo”

👉 “teño que agradar aínda que non me apeteza”

A disciplina positiva recórdanos algo importante: o agarimo ofrécese, non se esixe.

Podemos ensinar respecto e cortesía sen cruzar ese límite:

🌼 ofrece alternativas

“podes saudar coa man, cun chocar de mans ou cun abrazo… ti elixes.”

🌼 valida a súa necesidade

“vexo que hoxe non che apetece. está ben.”

🌼 acompaña á familia con calma

“estamos ensinándolle a escoitar o seu corpo. grazas por comprender.”

Cando respectamos o seu “non”, estamos construíndo algo enorme: autonomía, seguridade e consentimento.

✨ Ideas prácticas para estas festas

✔️ menos plans, máis momentos tranquilos

✔️ explica antes o que vai pasar (anticipar calma moito)

✔️ tempos curtos con xente e pausas para descansar

✔️ algúns límites claros (pantallas, horarios, azucre… con amabilidade)

✔️ espazo para as súas emocións, mesmo cando non nos cadran

Non buscamos que “gocen si ou si”. Buscamos que se sintan acompañados e acompañadas tal e como están.

🌷 E para ti, que acompañas

Ti tamén vés cansa do trimestre, da loxística, de chegar a todo, e ademais decembro parece pedir sempre un pouco máis.

Non precisas facelo perfecto. Necesitas respirar, elixir e soltar o que non é imprescindible.

🔸 podes simplificar

🔸 podes dicir que non

🔸 podes chegar “o xusto”

🔸 podes buscar o teu propio ritmo

Criar con respecto tamén é respectarte a ti.

🌾 Un recordatorio suave

As festas pasan, os agasallos gárdanse, os xogos cambian, os compromisos rematan. O que queda é o vínculo.

E o vínculo constrúese así: con presenza, con límites que coidan, con bicos que se elixen e con agasallos que non substitúen o tempo xuntos.

💬 Como vivides na casa estas festas? Que vos axuda a levalas con máis calma? lémovos con agarimo. 🌻