📖Disciplina Positiva e estudo: acompañar sen presionar

As primeiras épocas de exames, traballos finais e tardes longas de estudo xa están aquí. E con elas chega algo que moitas familias recoñecen ao instante: discusións polos deberes, tensión polos exames, présas, “concéntrate”, “veña, termina xa”, “se non estudas vas suspender”…

O estudo, desde fóra, parece algo sinxelo: sentarse, concentrarse e facelo. Pero por dentro —e máis aínda para nenos, nenas ou adolescentes— é un proceso emocional, cognitivo e relacional moito máis complexo do que pensamos.

A Disciplina Positiva pode axudarnos a mirar esta etapa con máis conexión, respecto e realismo para que este tempo sexa máis leve para toda a familia.

🧠 O que pasa no cerebro cando estudan

Estudar require funcións executivas que aínda están en pleno desenvolvemento:

Organizarse

Planificar

Manter a atención

Xestionar a frustración

Regular emocións

Pedírllelles que estuden “ben”, “á primeira” ou “sen despistarse” é como pedirlle a unha planta pequena que dea sombra. Chegará, pero necesita tempo, acompañamento e condicións adecuadas.

Ademais, cando aparece a presión (“se non estudas, vaiche ir mal”), o cerebro activa a amígdala e bloquease. Non aprenden mellor: aprenden con máis medo.

🌱 A mirada da Disciplina Positiva

A Disciplina Positiva non é permisiva nin ríxida: é respectuosa e realista. No estudo, propón por exemplo:

✔️ Acompañar sen controlar

✔️ Poñer límites desde o respecto

✔️ Fomentar autonomía paseniño

✔️ Ver o erro como parte do proceso

✔️ Priorizar a conexión sobre a esixencia

O obxectivo non é que estuden perfectos nin segundo a nosa idea persoal, senón que aprendan a xestionar o seu propio proceso con confianza.

✨ Ideas prácticas para acompañar o estudo sen presión

🔸 1. Rutinas claras, non ríxidas

Unha hora aproximada de estudo axuda ao cerebro a anticiparse, pero sen convertelo nunha loita de poder.

🔸 2. Preparar o ambiente

Menos estímulos, máis claridade. Un espazo sinxelo, materiais a man e tempos curtos funcionan mellor que “dúas horas sentados”.

🔸 3. Tempos reais

O foco infantil dura 10–20 minutos; o adolescente, 20–40. Estudar sen pausas longas non é realista.

🔸 4. Preguntar antes de corrixir

En vez de: “Iso está mal”, probar con: “Que cres que falta aquí?” Fomenta pensamento crítico e autoestima.

🔸 5. Dividir tarefas

“Primeiro o título, logo o exercicio 1, despois o 2.” A organización tamén se aprende.

🔸 6. Usar alento en vez de eloxios baleiros

“Vin que che custou empezar, pero segui che. Iso é constancia.”

🔸 7. Conectar antes de esixir

Un abrazo, un pouco de conversa, unha pequena pausa… O cerebro aprende mellor cando se sente seguro.

🔸 8. Acompañar as emocións, non apagar o clima

“Entendo que esteas frustrado/a, podo quedar contigo mentres o intentas.” Non quitamos a dificultade, pero si a soidade.

🌷 E para ti, que acompañas

Acompañar o estudo cansa. Require paciencia, tempo, respiracións profundas e moita flexibilidade. Ás veces enfadaraste, outras frustraraste, outras non saberás que facer. É normal.

Un recordatorio suave:

✔️ Non es o seu profe.

✔️ Non tes que sabelo todo.

✔️ Non necesitas controlar cada deber.

✔️ O teu papel é acompañar, non perfeccionar.

Cando escolles a conexión por riba da presión, o teu fillo ou filla aprende dúas cousas fundamentais: que aprender é un camiño, non un exame, e que o seu valor non depende dunha nota. Iso si que lles acompaña toda a vida.

🌾 Un recordatorio suave

Os exames pasan. As notas cambian. O que queda é o vínculo, a confianza e a seguridade de sentirse acompañados, mesmo cando algo se lles fai costa arriba.

A Disciplina Positiva recórdanos que aprender non é obedecer, é crecer.

💬 Como levades na casa esta época de exames? É un tema tranquilo ou adoita tensarse o ambiente? Lémovos con cariño