🌻 O final do verán: un adestramento emocional

O final do verán non é só o peche dunha estación emocionante: é un adestramento emocional natural.Cada ano, nenos e nenas atravesan este cambio, e cada ano o seu cerebro exercítase en habilidades esenciais: flexibilidade, tolerancia á frustración, adaptación e confianza.

E aquí vén o bonito: a maneira en que lles acompañamos nesta transición axúdalles a construír circuitos neurolóxicos que logo usarán toda a vida cando se enfronten a cambios na súa vida adulta (mudanzas, novos traballos, rupturas, perdas…).

🧠 Que ocorre no cerebro infantil?

Na infancia, a corteza prefrontal —a parte do cerebro que regula os impulsos, organiza e planifica— aínda está en desenvolvemento. Por iso, os cambios de ritmo e rutina poden sentirse enormes, case inabordables.

Cando algo remata (o verán) e empeza algo novo (o cole, as rutinas), os nenos e nenas pasan por un pequeno “loito”. O cerebro activa a amígdala, que dispara emocións intensas: rabietas, tristeza, resistencia. Estas son dificilmente controlables.

A nosa función como persoas adultas non é evitar ese proceso, senón prestar calma e ofrecer seguridade mentres o seu sistema nervioso se reorganiza.

🌱 Como acompañar este cambio desde a Disciplina Positiva

Aquí é onde a Disciplina Positiva nos lembra que acompañar non é impoñer nin sobreprotexer, senón estar presentes con amabilidade e firmeza.

Algunhas ideas prácticas:

🔸 Dar linguaxe ao que ocorre: “Cando algo cambia, ás veces dá medo ou tristeza. Iso é normal.” Poñer palabras axuda a integrar a experiencia.

🔸 Ofrecer pequenas decisións: “Prefires preparar a mochila hoxe ou mañá?” Decidir no pequeno dá sensación de control no medio dun cambio maior.

🔸 Rituais de peche e apertura: O cerebro infantil necesita símbolos. Un pícnic para despedir o verán, ou un almorzo especial o primeiro día de cole, axúdalles a marcar o paso emocional dunha etapa a outra.

🔸 Validar e alentar: “Non pasa nada se che custa volver, confío en que pouco a pouco o conseguirás.” O alento non quita a dificultade, pero ofrece confianza.

🪞 E para ti, que acompañas

Ti tamén estás atravesando un gran cambio, aínda que teñas máis práctica e experiencia de vida. O final do verán significa reorganizarte, volver xestionar tempos e esixencias.

Lembra: acompañar non é ter todas as respostas, é estar dispoñible.

🌷 Podes recoñecer: “A min tamén me custa, pero aquí estou contigo.”

🌷 Podes soster, mesmo sen palabras, só coa túa presenza.

🌷E tamén podes darche permiso: non tes que facelo perfecto para que o teu peque aprenda, abonda con volver unha e outra vez á conexión.

✨ Un recordatorio suave

O final do verán non é un obstáculo que superar, senón unha oportunidade de crecemento compartido. Cada resistencia, cada bágoa, cada conversa é parte dese adestramento emocional que os teus fillos e fillas están construíndo contigo como guía.

Non precisan un verán eterno, precisan saber que aínda que as estacións cambien… ti segues aí.

💬 E vós, como estades vivindo na casa este peche do verán? Cústavos volver á rutina ou síntese como un alivio? Léemoste con agarimo 🌻